عريان فهيم واحد من اهم خبراء المجوهرات و الدهب فى مصر و الوطن العربى .. حفر اسمه من ذهب فى عالم الذهب و عاشق للفن من قديم الزمن .. تحدث عريان عن الاحوال الاقتصادية لسوق الذهب فى مصر و لماذا دخل عالم الانتاج السينمائى باول فيلم له " خلى بالك من اللى جاى " .. فكان معه هذا الحوار .

* بما انك خبير مجوهرات اية رايك فى اسعار الدهب حاليا ؟
- خلينى ارجع بالزمن شوية الدهب عام 1963 كان الجرام 41 قرش و فى عام 1966 ب جنية و نص ..فالدهب على طول فى صعود و لا يهبط الا فى حدود قليلة ثم يعاود الصعود مرة اخرى  .. فمثلا الدهب حاليا يناير 2020 الجرام 690 جنية و فى يناير 2030 هيوصل 1500 جنية.

* كيف تحدث الفجوات فى الاسعار للدهب ؟ 
-فجوات اسعار الدهب تاتى من الحروب او مشاكل الدول العربية و الاوربية .. فاى دولة بتحارب الدهب يصعد لانه يباع لامريكا و سويسرا و يتحول لسلاح  .. فالدهب بيولع مثل البورصة تماما يكسبك  فى الاول مبالغ كبيرة ثما يأخذ كل الموجود عندك مثل القمار .
* هل الدهب مرتبط بالدولار فى الصعود و الهبوط ؟
- موضوع ارتباط الدهب بالدولار الاثنين يصعدا معا حاليا لاننا نستورده بالدولار .. فمثلا بعد ضربة امريكا لاثنين من الايرانيين على ارض العراق الدهب ارتفع من 665 الى 690 .. و زمان كان يربطوا الدهب بالقطن الان لم يعد يحدث الا بالدولار.

* ما رايك فى ان هناك دول ربطت عملتها و اقتصادها بالدهب؟
- اكيد دى دول فاهمة و عارفة ان الدهب هو الاساس .. فرصيد سويسرا دهب و اى مكان فى العالم يرتبط بالدهب يكون قويا .

* ما الذى جعل الدهب يتراجع فى مصر ؟
-ايام الملك فاروق كان الجنية بجنية و الدهب 97 قرش .. و الذى جعل الدهب فى مصر ينزل فى فترة ما بعد الملك فاروق كان حرب اليمن لان كانت حرب جبهة فساد و سرقة و خسارة .. ايام الملك كان كرسى فاروق بملايين الجنيهات و المليم الاحمر كان له قيمه .. كل وقت له طبيعته و ظروفه... فمثلا دبى فى 1972 كانت 4 بيوت و الان الوضع مختلف .

* كيف بنستورد دهب و عندنا منجم السكرى ؟
- منجم السكرى فيه خيرات كثيرة و لكن لا نملك القوة و الخبرة لاستخراج الدهب من الجبل فكان 80 % لحساب الشريك الاجنبى و 20 % حصة مصر و ناخدها بعد بيعه .. المشكلة فى من يستخرج الدهب و يعرف كيف يسوقه .. و منجم السكرى به خيرات كثيرة لاجيال ماتت و اجيال قادمة.

*ما هى روشتة علاج سوق الدهب فى مصر ؟
-روشتة العلاج للسوق المصرى حاليا ان يكون الاوضاع الاقتصادية قوية و هناك تصدير و ان يعود الفلاح الى زراعة الارض و التصدير الى الخارج من المنتجات و خيرات الارض فاكهة و قطن و خضراوت وغيرها الاراضى الزراعية انتهت و السيسى حاليا يقوم بعمل اراضى زراعية جديدة  عشان نرجع نصدر تانى و يكون فيه خير .

* الا يوجد سيولة فى السوق .. لذا لا يوجد حركة بيع و شراء؟
-السيولة موجودة و لكن محدش مش عايز يطلعها .. الكل قاعد فى حالة ترقب لكل ما يحدث فى المنطقة العربية .

* لماذا دخلت مجال الانتاج الفنى و السينما ؟
-حبى للفن من 1974 منذ جاءت لى احلام شلبى و سهير شلبى و نجوى عزام و محمد عوض و حتى الان مع الوقت و انا بحب الحياة و بحب السهر و الليل جعلت هناك عشرة كبيرة مع الناس دى من 45 سنة و الناس دى  حتى الان علاقتنا جيدة .
فمن 25 سنة  كنت عايز انتج افلام .. و كان اول فيلم اسمه "اسماعيلية رايح جاى" بطولة هنيدى و لكن اختلفت مع العدل على 100 الف جنية فخدوا محمد حسن رمزى و عملوا وربنا وفقوا فيه .
و من 12 سنة ايضا حبيت اجرب و لكن اختلفنا لان المنتج الفنى كان فى الوقت دة عبارة عن سمسار .

* ما الجديد الذى تقدمه خلال الفترة القادمة؟
- بدءت من عامين و عملت فيلم اسمه "خلى بالك من اللى جاى" اخراج عادل الاعصر تاليف حمدى يوسف و بطولة رانيا يوسف و صلاح عبد الله و مجدى كامل و سليمان عيد سارة سلامة و ادوارد و احمد سلامة و نور فخرى و مى القاضى ..توزيع هشام عبد الخالق و نازل فى اجازة نصف العام و ان شاء الله داخل فى الانتاج بمجرد نشوف رد فعل الفيلم دة فى السوق .