حكاية سائق "توك توك" بدرجة ماجستير

"اسلام فوزى" ده اسم بطل قصتنا النهاردة حاصل على درجة الماجستير فى القانون من جامعة المنوفية لكنه لم يجد فرصته فى التعيين كغيره من الحاصلين على نفس الدرجة العلمية. اسلام بيشتغل منذ ان كان فى المرحلة الابتدائية فى "فراشة الأفراح" وأول مبلغ حصل عليه كان جنيه وتدرج فى تلك المهنة حتى وصل أجره لـ 200 جنيه فى اليوم. الفلوس دى اسلام كان بيصرف بيها على تعليمه وبيساعد بجزء فى توفير متطلبات أسرته، لكن فيروس كورونا اللعين وقرار مجلس الوزراء بمنع الأفراح سبب أزمة كبيرة للعاملين فى المجال ده ومنهم بطل قصتنا النهاردة. اسلام رفض انه يبقى "عاطل" وقرر انه يشتغل سائق توك توك وأطلق على التوك توك ده "توك توك الماجستير"فى محاولة ساخرة منه للوضع المقلوب فى التعينات. اسلام كان نفسه يكمل رحلته ويحصل على درجة الدكتوراه لكن مصروفاتها الكتير وتجهيز شقيقته بتمنعه انه يكمل حلمه، لكنه بيناشد الدولة النظر لحملة الماجستير وتعينهم. اسلام نموذج مشرف لشاب من الأرض الطيبة لازم كلنا نفخر بيه وندعمه.