العمر ضاع
وراحت صحتى
وأدينى بعافر
وأجيب لقمتى
الزمن أسى
وأه من وحدتى
والصبر عكازى
وراضية بقسمتى
على الله تكالى
كافينى حوجتى
يهون الشقى يوماتى
ولا حد يذلنى
وأعيش رافعة راسى
ولا كلمة تمسنى
اللى يحترمنى أحترمه
واللى يطمع فيا بنارى ينكوى
واللى عايز يستغل فقرى
أدوب على راسه شبشبى
دى الكرامة راس مالى
ولو هبيع هدمتى
وعزة النفس طباعى
ولو الجوع سكن معدتى
والخوف من الله مالينى
والرزق الحلال مطلبى
والشرف عندى غالى
ولا أصرخ وأقول حسرتى
أبويا على الشرف ربانى
وأمى كانت قدوتى