حد يحوش الست مراتي كل القبض ما ييجي يا سادة
نفسها مرّة تلاقي زيادة
عركة بتحصل زي العادة
ومتهدّد بالقتل يوماتي
حد يحوش الست مراتي
,,,
عايز أعرف مين يا ولاد
قال لها فوقي يا حاجّة سعاد
دا انتي مرتب جوزك زاد
ح يجيبلك طعميّة ليلاتي
حد يحوش الست مراتي
,,,
قاعده بتسمع في الاخبار
جنب الشاشة ليل ونهار
خفوّا شويّة كفايه هزار
دانا مش سامع صوت لعياطي
حد يحوش الست مراتي
,,,
حد يقول ان النسوان
بتصدّق حتى الاعلان
وان عازت لو باكو لبان
بتلخبط كل ملفـّاتي
حد يحوش الست مراتي
,,,
اجري يا عم وحلـّق حوش
خلـّيك اسرع م الخرطوش
أنا أصلا عايش مرووش
مش قادر انفد بحياتي
حد يحوش الست مراتي
,,,
قاعدة تكيّل في الدرجات
تعمل خط على العلاوات
والحسبة تجمّع الوفات
والحد العالي من الواطي
حد يحوش الست مراتي
,,,
كارت الشحن ما كفـّاش نوبه
والشهر يعوز كام انبوبه
وأنا مش لاقي غير السّبّوبه
يعني يصح ابيع خلقاتي
حد يحوش الست مراتي
,,,
عامله حكومة يا ناس في البيت
هات السّكر هات الزيت
وانا من خوفى أبات في الغيط
وطول الليل احلم حماتي
حد يحوش الست مراتي
,,,
حد يقول للعدّاد هدّي
جايز نص الشهر يعدّي
أو لماسورة المايّه اتسدّي
وانا ح اتفاهم مع اقساطي
حد يحوش الست مراتي
,,,
حد يقول للبنك يسيبني
دا انا متكعبل في رسوم ابني
غاوي الفقر يا ناس يلاعبني
ولمّا غلبني ما حطـّش واطي
حد يحوش الست مراتي
,,,
نفسي ألاقي جنيه متوفـّر
ويكون ليّا حساب متشفـّر
أقعد أغنيّ وهيّا تصفـّر
على نغمة سيكا وبيّاتي
حد يحوش الست مراتي
متابعات
